სსიპ - კოლეჯი "აისი"

ხელით ელექტრორკალური შედუღება-პროფესიული მომზადების პროგრამაზე სწავლა შეუძლია ყველა დაინტერესებულ მინიმუმ საბაზო განათლების მქონე სრულწლოვან პირს, რომელსაც აქვს სურვილი მოკლე დროში მიიღოს კონკრეტული ცოდნა/უნარები და დასაქმდეს აღნიშნული მიმართულებით. .პროფესიული მომზადების პროგრამის ხანგრძლივობა შეადგენს 10 კვირას, კვირაში - 20 საათს. სწავლება განხორციელდება მაღალი კვალიფიკაციის და პრაქტიკული გამოცდილების მქონე სპეციალისტის მიერ, შრომის უსაფრთხოების და თანამედროვე რეგულაციების გათვალისწინებით. სწავლის შედეგების მიღწევა განხორციელდება კოლეჯის ბაზაზე, პროფესიული სტანდარტების შესაბამისად აღჭურვილ A და C გარემოში. პროფესიული მომზადების პროგრამის ფარგლებში გათვალისწინებული სწავლის შედეგების მიღწევის შემდეგ კურსდამთავრებული მიიღებს კვალიფიკაციის დამადასტურებელ, სახელმწიფოს მიერ აღიარებულ სერტიფიკატს დანართით, რომელშიც ფიქსირდება პირის მიერ პროგრამის ფარგლებში მიღწეული ცოდნა და უნარები.

ხელით ელექტრორკალური შედუღება-პროფესიული მომზადების პროგრამის მიზანია მოამზადოს შესაბამისი კომპეტენციის მქონე კადრი, რომელიც შეძლებს ელექტრო-რკალური შედუღების ტექნოლოგიის თავისებურებათა დახასიათებას; სამუშაო ნახაზის, ტექნოლოგიური ინსტრუქციისა და ტექნოლოგიური რუკის წაკითხვას; სამუშაო ადგილის ორგანიზებას, შესასრულებელი სამუშაოს შესაბამისად აღჭურვილობისა და ინსტრუმენტების შერჩევასა და მომზადებას; უსაფრთხოების წესების დაცვით შესადუღებელი დეტალების ხელით რკალური შედუღებას სხვადასხვა სივრცულ მდებარეობაში (ქვედა, ჰორიზონტალური, ვერტიკალური, ჭერისული); შესრულებული სამუშაოს ხარისხის კონტროლსა და დეფექტების გამოსწორებას; ასევე შესრულებული სამუშაოს შესახებ დოკუმენტაციის შედგენას.