ენერგოეფექტურობის ცენტრი საქართველო

პროფესიული გადამზადების პროგრამის მიზანია შენობების ენერგოეფექტურობის (ეე) სერტიფიცირების ექსპერტების გადამზადება. ეს ახალი და მოთხოვნადი პროფესიაა საამშენებლო ინდუსტრიაში, რადგან კანონმდებლობით სერტიფიცირება სავალდებულოა ყველა ახალი, გაყიდული ან დაქირავებული შენობისთვის. პროგრამაზე სწავლის უფლება აქვთ უმაღლესი პროფესიული ან აკადემიური განათლების მქონე პირებს, რომლებსაც აქვთ შესაბამისი გამოცდილება მშენებლობასა და ენერგოუზრუნველყოფაში. პროგრამის მსმენელები შეისწავლიან ეე-ს საკანონმდებლო მოთხოვნებს, შეფასების მეთოდებს, ტექნიკურ სტანდარტებს და უსაფრთხოების ნორმებს. ისინი შეძლებენ ენერგიის მოხმარების მონაცემების ანალიზს, შენობების ეე-ს ინსტრუმენტულ კვლევას და სერტიფიკატების მომზადებას. პროგრამის ხანგრძლივობაა 7 კვირა, ჯამური დატვირთვა – 48 საათი, კვირეული დატვირთვა – 6-8 საათი. სწავლების დროს გამოყენებული იქნება ინტერაქტიული მეთოდები, ხოლო პრაქტიკული კომპონენტი რეალურ სამუშაო გარემოში ჩატარდება. მსმენელთა შეფასება მოიცავს თეორიულ და პრაქტიკულ კომპონენტებს. კურსის წარმატებით დასრულების შემდეგ გაიცემა სახელმწიფოს მიერ აღიარებული ორენოვანი სერტიფიკატი შესაბამისი დანართით. კურსდამთავრებულები კანონმდებლობის შესაბამისად შეძლებენ დარეგისტრირდნენ დამოუკიდებელ ექსპერტებად და განახორციელონ პროფესიული საქმიანობა.

პროგრამის მიზანია შესაბამისი კვალიფიკაციის კადრის მომზადება, რომელიც იცნობს ენერგოეფექტურობის შესახებ საკანონმდებლო მოთხოვნებს, შენობების ენერგოეფექტურობის შეფასების მეთოდებს, უსაფრთხოების ტექნიკურ პირობებსა და მოთხოვნებს, მას შეუძლია შენობებში ენერგიის მოხმარების მონაცემების შეგროვება, ანალიზი და სანდოობის შეფასება; შენობების ენერგოეფექტურობის ინსტრუმენტული კვლევა და შენობის ან შენობის ნაწილის ენერგოეფექტურობის სერტიფიკატის მომზადება და წარდგენა.